Shumë shpesh, kur njerëzit ndahen, ata flasin për ish-bashkëshortët e tyre me indinjatë. Mendohet se po të mos kishte ankesa, nuk do të kishte pasur as ndarje. Por një grua, e cila përjetoi momente shumë të vështira psikologjike gjatë ndarjes nga burri i saj, arriti të gjejë vetëm anët e mira. Ajo ia shprehu mirënjohjen e saj burrit në një letër të hapur.
«I dashur ish-burri im, sot, më në fund, përfunduan 15 vitet e mia të jetës me ty. Siç e sheh, e “shlyeva” dënimin tim plotësisht – nga firma në zyrën e gjendjes civile, deri te nënshkrimi im në procesin e divorcit.
Tani dal në liri me ndërgjegje krejtësisht të pastër. Dhe, në fund, dua të të shpreh falënderimin tim të sinqertë për gjithçka që më dhe.
-
Falë teje mësova të përballoj me qëndrueshmëri fatkeqësitë e ndryshme të jetës – si humbja e çelësave, parave, celularit. Gjithmonë gjeja vetë zgjidhje për çdo situatë, vetëm që të kurseja nervat e tua të brishta.
-
Falë teje mësova të bëj injeksione. Ndodhi që fëmijët sëmureshin dhe nuk kishte mundësi të thërrisja infermieren në shtëpi. Më duhej të merrja guximin dhe t’i bëja vetë injeksionet. Pastaj të sillja në vete edhe ty.
-
Falë teje mësova me mjeshtëri të bëj çdo punë riparimi në shtëpi. Një raft i prishur – asnjë problem. Ndërrimi i tubit të ujit nën lavaman – punë fare e thjeshtë. Ty gjithmonë të mungonin koha dhe forcat për këto gjëra, kështu që mua më duhej të mësoja të përdor shurubelën, çelësin e rregullueshëm dhe çekiçin. Tani nuk kam më frikë të rri në shtëpi pa burrë.
-
Falë teje mësova të negocioj me zyrtarë, të merrem me policët e qarkullimit, të paguaj gjoba, të shkruaj shpjegime. Dhe, pasi të morën patentën, më duhej të mësoja edhe të ngas makinën – sepse dikush duhej të të sillte nga festat ku shkoje.
-
Falë teje kam një trup të fortë e të tonifikuar, sepse jam vazhdimisht në lëvizje: herë të ngre çantat me ushqime deri në shtëpi, herë të gërmoj gjithë kopshtin me lopatë, sepse ty papritur të kapi krampa gishti i pestë dhe nuk mund të ngriheshe nga divani.
-
Falë teje mësova disa profesione, sepse dikush duhej të fitonte para në këtë familje.
-
Dhe për çfarë të jam vërtet mirënjohëse – është që ti më në fund ike, i lodhur nga moskuptimi total i natyrës tënde delikate. Ike duke përplasur derën fort. Ndoshta nuk dëgjove psherëtimën e lehtësimit që më doli nga gjoksi im».
