U mblodhën të ftuarit: të afërm, miq, kolegë. Dhe ja, para të gjithëve, burri im më quajti shërbyesen e tij. I paska ardhur turp nga unë.
Tanja ishte në këmbë që herët në mëngjes: duhej t’i çonte fëmijët në shkollë, të hynte në dyqan, të niste pastrimin. Sot ishte planifikuar një darkë e madhe festive në nder të postit të ri të burrit të saj. Do të kishte shumë mysafirë. Çdo gjë duhej të shkëlqente. Me këmbënguljen e burrit, Tanja kishte lënë punën dhe karrierën dhe ishte bërë amvise. Por sot duhej të dukej si një zonjë e parë. Ishte festa për nder të njeriut të dashur. Në kthim nga shkolla, hyri të blinte një fustan të ri.
Çdo gjë që i pëlqente ia nxirrte më shumë në pah kilogramët e tepërt. Zgjodhi një fustan që nuk ishte në stilin e saj, por të paktën i fshihte mangësitë e trupit. Të ftuarit ishin të shumtë. Me vështirësi u futën në dhomën e ndenjjes. Aty ishin të afërm, miq, dhe kolegë të punës. Të gjithë kishin ardhur me bashkëshortet e tyre. Fëmijët i mori nëna e Tanjas që të mos pengonin. Tanja vraponte gjithë mbrëmjen midis kuzhinës dhe dhomës së ndenjjes duke shërbyer ushqimet.
— Artur, ju urojmë për hapin e ri në karrierë. Bëni njohje – kjo është gruaja ime, Irina. Ajo do të punojë në departamentin tuaj, — tha shefi i Arturit. — Jam i sigurt se do të punoni mirë bashkë.
Edhe burrat e tjerë nisën të prezantonin gratë e tyre. Arturi e ndali Tanën që po kalonte me nxitim.
— Bëni njohje, kjo është Tanja. Shërbyesja ime! — tha ai.
Të gjithë heshtën.
— Po unë mendoja se Tanja ishte gruaja jote… — tha i hutuar shoku i Arturit.
Tanja, me lot në sy, vrapoi në kuzhinë. Burri i saj shkoi pas saj.
— Ç’ke kështu, s’kupton shaka? — tha ai i nervozuar.
— Shaka?! Më fyeve para të gjithëve! Përse?!
— Po shiko gratë e tyre. Ndërsa ti vrapon këtu me tenxhere. Turp.
Dhimbja u kthye edhe më e fortë. Tanja shpërtheu në lot. Ajo kishte lënë punën për të. Ai kishte këmbëngulur që ajo të merrej vetëm me fëmijët. Dhe tani i vinte turp prej saj?! Kjo qenka mirënjohja e tij për vitet e përkushtuara familjes. Për dashurinë e saj të pakufishme.
